Flåmsbana – ei av dei finaste togreisene i verda

Opplev Flåmsbana

Flåmsbana er ein av Noregs mest populære turistattraksjonar og blir rekna som ei av dei beste togreisene i verda. Den naturskjønne reisa byr på panoramautsikt over vakre fjordar, snødekte fjell, frodige skogar og brusande fossefall.

Flåmsbana går frå høgfjellsstasjonen Myrdal (867 meter over havet) på Bergensbanen til Flåm (2 meter over havet) inst i Aurlandsfjorden. Flåmsbana er ein av dei brattaste togbanane i verda. Det meste av strekninga har ei stigning på 5,5 prosent.

Frå Myrdal til Flåm

Reisetida frå Myrdal til Flåm er rundt ein time. Reis forbi elvar som skjer seg gjennom djupe juv, fossar som stuper ned bratte fjellsider, og kvite toppar med små gardar som klamrar seg fast i fjellsida.

Len deg tilbake, og nyt det beste norsk natur har å by på, medan togturen tek deg forbi den ville og vakre Kjosfossen. Flåmsbana tek ein pause her på cirka fem minutt, slik at passasjerane kan trekkje frist luft, nyte utsikta og ta bilete av dei utrulege omgivnadene.

Historia til Flåmsbana

Flåmsbana vart bygd som ei transportlinje til fjorden frå byane Bergen og Oslo. Den gjorde også at fleire bygder fekk samband til resten av Noreg.

Bygginga vart godkjend av regjeringa i 1908, men arbeidet starta ikkje før i 1923. Banen vart ferdigstilt i 1940. Den første tida vart strekninga trafikkert av damptog som gjekk fram og tilbake og korresponderte med dagtog på Bergensbanen. Banen vart elektrifisert i 1944 som ein av dei første i Noreg.

Den 20 kilometer lange togturen viser norsk natur på sitt beste og er eit meisterverk innan norsk ingeniørkunst. Flåmsbana er kjend for dei imponerande tunnelane sine, som vrir og buktar seg mellom fjella – 18 av dei 20 tunnelane vart bygde for hand.